اردنيات

للإستعلام والتأكد فقط عن شركات تحفر آبار خيرية

عمان نيوز- معتز هارفيل

للإستعلام والتأكد فقط ..

يا إخوان كثير بنشوف إعلانات لشركات حفر الآبار في بلاد المفروض فقيرة .. وأسماءهم كثيرة ..

وكثير من الإخوان عنا بعتمدوا هاد الموضوع من باب الصدقة الجارية عنه أو عن روح والديه أو فلان عزيز عليه .. وبحولولهم مبالغ مالية بهدف حفر بئر ماء ..

رغم إنه الكثير بقولوا الأقربون أولى بالمعروف وفي كثير طرق لتعمل صدقة جارية في بلدك .. لكن مش هون الموضوع ..

دائما بنشوف إعلانهم .. حاطين في الخلف لوحة عليها إسم الشخص المتبرع .. وهالمضخة اليدوية لونها أحمر غالبا .. وشخص من هذيك البلاد بقوم بضخ الماء .. وسطول مي حولهم ..
وكم شخص واقفين بجنبه قاعدين يدعوا ويشكروا الشخص المتبرع .. ونفس طريقة التصوير .. حتى بتحس نفس طريقة الدعاء ..

ما صدف شفت مثلا آلية مصورينها أثناء حفر البير .. أو عالقليلة آثار التراب من الحفر .. أو تمديد مواسير داخل الأرض لتتركب عليها المضخة .. أو حتى تصوير لحظة خروج الماء لهالمنطقة اللي المفروض ذابحهم العطش ..

إعتبروني غشيم .. وبسأل .. لأنه فعلا ما بعرف .. هل هاي شركات صادقة ؟؟

سيبك من السمعة … بسأل .. حدا شاف بعينه فعلا انه هاي المبالغ البسيطة .. كفيلة بحفر بئر مي عندهم ؟!!

يعني صاحب شركة الحفر .. عنده آليات مثلا .. ومستني فلوس حق ديزل ومواسير ومضخة وخلص الأمور بتصير جاهزه ؟

ياريت اللي عنده تجربة وااااقعية .. وبعينه شاااف ومتأكد ١٠٠% يفيدنا ..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى